CAPIZ – May yara na sang inisyal nga resulta matapos ang ginpatigayon nga imbestigasyon may kaangtanan sa nagviral nga video kung sa diin duha ka mga miyembro sang Jamindan Municipal Police Station ang naulamid sa kinagamo sa tunga sang sibilyan.
Sa interview sang Bombo Radyo sa Capiz PNP Provincial Director nga si PCol. Albert Tapulao, ginpahayag sini nga ini ang base sa mga nakasaksi sa insidente kag mga kuha nagikan sa Closed-circuit television (CCTV) footage subong man sa mga nagalapta nga video online.
Suno kay PCol. Tapulao, apisar nga may yara na sang inisyal nga resulta magapadayon sa gihapon ang ila pag-imbestiga agud matul-id kung anu man matuod nga natabo.
Mahibaluan nga desidido nga magpasaka sang kaso ang mga opisyal nga sanday PSSg. Ezequias Villeza kag PCpl Apolonio Llait batuk sa mga sibilyan nga sanday alyas “Joe”, 24-anyos kag alyas “Mark”, 22-anyos, matapos nakipagbayluhanay sang inumol kag nagbuhi sang mga malain nga tinaga.
Sa karun, natalana nga pasakaan sang patong-patong nga kaso ang nasambit nga mga sibilyan samtang nagapabilin ang mga ini sa kustodiya sang Jamindan MPS para sa nagakaigo nga disposisyon.
