ROXAS CITY – Nagapadayon ang imbestigasyon sang mga kapulisan sa panibag-o naman nga kaso sang pagpanghold-up sa isa ka dalagita sa kilid sang Villareal Stadium, Camansi St. Brgy. Tiza sini nga syudad.
Sa pakig-angut sang Bombo Rayo kay PLtCol. Aron Palomo, hepe sang Roxas COmponent City police station, ginpahayag sini nga ginareview na sang mga kapulisan ang posible nga gin-agyan sang duha ka mga suspek.
Suno diri, wala gilayon nakaresponde ang mga kapulisan bangud ulihe na nabaton ang report kag wala makapatigayon sang hot pursuit.
Sa karon, ginareview na ang mga cctv footages nga posible nakakuha sang paglabay sang mga suspetsado.
Samtang, indi pa matumod sang hepe kun isa lamang ka grupo ang yara sa likod sang mga iligal nga buluhaton.
Matandaan nga, natigayon nga madakpan sang mga kapulisan ang duha ka menor de edad nga suspetsado sa pangpanghold-up sang damlag lang.
Dugang pa ni Palomo, nga mas pasangkaron pa ang mga monitoring sang mga kapulisan agud matapna ang iligal nga aktibidad kasubong sang pagpanghold-up sa syudad.
Panugyan ni Palomo sa mga pumuluyo ilabi na sa mga kababaihan nga likawan ang mag-isahon, maggamit sang cellphone kun gab-I, maglagaw sang dis-oras kag madulom nga lugar bangud nagapangita lamang sang opurtunidad ang mga may malain nga tinutuyo agud makahimo sang krimen.
