ROXAS CITY – Pagatutukan sang Committee on Health, Nutrition and Sanitation sang Sangguniang Panlungsod ang pag-imbestigar natuhoy sa natabo nga kamatayon sang 17 anyos nga solterito nga ginbuntog sang iya kaugalingon nga hinuptan nga cobra sa Barangay Bago, Roxas City.
Ini ang ginpahayag sang chairman sang nasambit nga komitiba nga si City Councilor Cesar Yap Jr. sang mainterview sang Bombo Radyo.
Nagpatigayon sang isa ka committee hearing ang amo nga komitiba kun sa diin ginpatawag ang magkatuhay nga ahensiya kapareho sang Provincial Environment and Natural Resources Office (PENRO), Department of Environment and Natural Resources (DENR), Provincial Health Office, Department of Health kag iban pa agud mahinalaan ang maid-id nga pag-imbestigar sa natabo.
Mangin ang pamilya sang napatay nga biktima ang nagtambong man sa amo nga sinapol.
Suno kay Yap, luyag sini nga matutukan sang hanay sang pulisya ang ila imbestigasyon ilabi pa nga may mga impormasyon nga may iban pa nga indibidwal nga nagahupot sang wildlife ukon exotic animals sa siyudad.
Kinahanglan man suno diri nga mausisa ang naghatag sang amo nga cobra sa napatay nga biktima.
Sa nasambit nga sinapol, natukiban man nga may yara sang nahanas nga doktor sa Capiz pananglitan may mabuntog sang man-og apang wala sang anti-venum nga vials ang probinsiya.
Suno diri nga ang Research Institute for Tropical Medicine (RITM) gid lamang ang naga-obra sini kun sa diin 30 ka vials sa sulod sang isa ka bulan gid lamang ang sarang nila mahimo para sa bilog nga Pilipinas.
Plano naman ni Yap nga magdihon sang isa ka ordinansa agud madakpan kag mapapanaugan sang penalidad ang sin-o man nga mapamatud-an nga nagahupot sang wildlife ukon exotic animals.
