Nagpahayag si former senador nga si Antonio Trillanes IV nga handa siya nga magtambong sa imbestigasyon nga ginapanawagan ni senador nga si Rodante Marcoleta may kaangtanan sa ginapatihan nga pagtinguha sa pag-aresto kay senador nga si Ronald dela Rosa.
Suno kay Trillanes, wala siya sang dapat kahadlukan kag andam siya nga magsabat sa bisan ano nga pamangkot may kaangtanan sa isyu. Ginsiling man niya nga importante nga mabuksan sa publiko ang kamatuoran agud mahibaluan ang matuod nga mga natabo sa nagluntad nga kontrobersiya.
Ini matapos ginpahayag ni Marcoleta ang posibilidad nga maghiwat sang imbestigasyon parte sa mga alegasyon nga may mga personalidad nga nalakip sa ginahambal nga plano sa pagdakop kay Dela Rosa. Bangud sini, ginpasiguro ni Trillanes nga magakooperar siya sa bisan ano nga opisyal nga imbestigasyon nga pagadumalahan sang Senado.
