Ginsiguro sang National Police Commission (NAPOLCOM) nga mangin patas ang ila nga imbestigasyon batok sa 12 ka mga pulis nga naulamid sa kaso sang mga nadula nga manugbulang.
Madumduman nga ginpamatbatan sang komisyon ang nasambit nga mga pulis sang 90 days preventive suspension.
Sa isa ka pahayag, ginsiling ni NAPOLCOM Vice Chairperson kag Executive Officer Rafael Vicente Calinisan, nga katuyuan sang amo nga tikang nga mapabilin ang integridad sang imbestigasyon.
Makabulig man ini suno sa iya agud malikawan ang ano man nga impluwensya sa mga saksi kag igabuyagyag nga mga ebidensya.
Kalakip sa mga ginpamatbatan sang suspension amo sanday Police Colonel Jacinto Malinao Jr., P/LtCol Ryan Jay Eliab Orapa, P/Major Mark Philip Simborio Almedilla, kag iban pa.
Gin-akusaran na man ini sila sang mga kaso nga Grave Misconduct kag Conduct Unbecoming of a Police Officer.
Kalakip sila sa mga gina-akusaran sang whistle blower nga si Julie ‘Dondon’ Patidongan nga may kahilabtanan sa pagkadula kag pagpatay sa mga nadula nga mga manugbulang.
