ROXAS CITY – Padayon ang imbestigasyon sang mga kapulisan sa 63-anyos nga lalaki nga nasapwan patay sa Capricho II, Barangay Tanque, Roxas City.
Ginkilala ang biktima nga si Joselito Baltazar sang nasambit nga lugar.
Base sa inisyal nga imbestigasyon sang mga kapulisan nga nasapwan na lamang ni Junjun Dela Cena ang biktima sa kusina sa sulod sang ila balay nga naka-boxer kag wala na sang kabuhi.
Sa interview sang Bombo Radyo Roxas kay Dela Cena nga magadul-ong ini kuntani sang bill sang kuryente sa biktima apang ginkatingala sini kun ngaa wala nagasabat rason nga nagpalapit ini sa pirtahan sang balay kag nakasimhot sang mabaho rason nga iya ini gintsekyar kag nakita ang bangkay sang biktima.
Mahibaluan nga isa lamang sila ka compund sang biktima.
Ginpahayag pa sini nga nagaisahanon ang biktima bangud yara sa Metro Manila ang asawa sini kag yara naman sa luwas sang pungsod ang iya mga kabataan.
Dugang pa ni Dela Cena, nga makaduha ka beses nga gin-atake sang highblood ang biktima rason nga isa ini sa mga ginalantaw nga rason sang pagtaliwan sini.
Apang,ginpahayag naman ni Police Master Sergeant Ian De Paz sang Provincial Crime and Laboratory Office nga posible may yara sang nagsulod sa balay sang biktima bangud nga nagalinapta ang mga kagamitan sini kag narekober ang kutsilyo sa babaw sang iya katre.
Suno kay De Paz nga indi pa nila mabal-an subong kun may yara sang naangkon nga mga pilas ang biktima bangud yara na sa state of decomposition ang lawas sini.
Sa karon, natalana nga ipaidalom sa post mortem examination ang bangkay sang nasambit nga biktima.
