PANIT-AN CAPIZ – Nagpatigayon sang cross-matching examination ang mga katapo sang Panit-an Municipal Police Station Station sa narekober nga mga slug kag bala nga gingamit sa pagluthang-patay sa duha ka mga persona nga nasapwan sang magkatuhay nga Barangay sa nasambit nga banwa.
Sa interview sang Bombo Radyo kay PLt. Merry Chris Dela Cruz, Officer- in-charge sang nasambit nga police station, wala pa sila sa karun sang matumod nga mga suspetsado sa pagpatay sanday Hadjie Buñi nga gintiro sang ginapatihan riding in tandem sa Poblacion Ilawod kag Glenn Cabalo nga nasapwan-patay sa isa ka waiting shed kag may igo sang bala sa Brgy. Agbabadiang sa amu nga banwa.
Suno diri nga pareho nga iya sang calibre .45 nga sahi sang armas -luthang ang gingamit sa pagtiro sa duha ka mga persona rason nga ila ini iga-paidalom sa cross matching examination agud matumod kun isa lang ka persona ang may kahimuan sng krimen.
Dugang pa diri nga nagpakig-angut na ini sa mga katapo sang Roxas City Police Station sa ila imbestigasyon kay Cabalo bangud residente ini sang siyudad sang Roxas, kag isa ka ex-convict suno man sa mga kapulisan.
Sa bahin ni Buñi, posible may kaangtan sa ilegal nga droga ang iya sini kamatayon bangud isa ini ka drug surenderee sang tuig 2016 sa ila man lugar.
Sa karun, ginahulat pa ang resulta sang cross matching examination nga ipaguwa sang mga katapo sang Crime Laboratory sa bahin sang Iloilo, agud makabulig sa ila imbestigasyon angut sa kamatayon sang duha ka mga persona.
