ROXAS CITY – Nakapatigayon na sang Maternal Death Review pinaagi sa zoom meeting sadtong Nobyembre 5 ang pila ka mga doctors, department heads kag LGU’s sang imbestigasyon may kaangtanan sa pagkamatay sang mag-iloy nga Baylen sang Barangay Cubay, Pres. Roxas, Capiz.
Ini ang ginkompirmar ni Atty. Atlas Catalan, Information Officer sang gobyerno probinsyal sang mainterview sang Bombo Radyo.
Suno kay Catalan nga antes pa man natabo ang insidente nagkadto na si Mary Cris Baylen 30-anyos sa iya private attending physician sa amo man nga banwa matapos nga nakabatyag ni sang pagpalanakit sa tiyan.
Natukiban nga wala man ini ginhatagan sang bulong sang iya doktor sa baylo ginrefer ini sa Rural Heath Unit kun sa diin didto pa ini ginhatagan sang bulong kag ginpa-transfer sa Bailan District Hospital para sa emergency operation.
Wala man sang anesthesiologist ang amo nga opsital bangud nagapaidalom ini sa quarantine rason nga ginpakamaayo na lamang nila nga i-refer sa Roxas Memorial Provincial Hospital para sa Cesarean procedure.
Ginbalibaran naman ini bangud wala naman sang available nga bed capacity ang amo nga ospital rason nga ginpakamaayo na lamang nila nga magtawag sa private hospital para didto na lang dal-on ang pasyente.
Apang, ginapahayag nga batunon lamang sila sang private hospital kun may yara sang P30,000 nga down payment rason nga nagpangita man gilayon sang paagi ang pamilya Baylen apang P20,000 lamang ila natipon nga kwarta.
Nahibaluan nga Oktubre 25 na ini gindala sa private hospital apang makaligad ang 24 oras ginbawian man gilayon sang kabuhi si Mary Cris kun sa diin ang iya man attending physician ang naga-handle sa iya.
