ROXAS CITY – Padayon ang imbestigasyon sang Sigma Fire Station sa nagluntad nga sunog sa Vicente Andaya National High School nga nagtupok sa anum ka mga hulot klasehan kagab-i.
Sa anum ka mga hulot klasehan nga nasunog, lima diri ang totally burned kag isa ang partially burned.
Ginpahayag ni FO1 Rogen Guillermo, public information officer sang Sigma Fire Station nga gina-establisar pa nila sa karon ang gintunaan sang kalayo, apang ba-se sa pagpangusisa sa nakakita, gintumod sini ang hulot klasehan ni Mrs. Mariano sa diin una nakit-an ang kalayo.
Apang antes nagkalayo, nabatian pa ang lupok nga ginsundan sang pagdaba daba sang hulot ni Mariano tobtob naglapta sa kaingud sini nga mga hulot klasehan.
Gilayon nagpangayo sang bulig ang nakakita sa mga residente nga malapit sa lugar kag pag-imporma ang Sigma Fire Station nga nagresponde sa ginluntaran sang sunog kalakip sang nag-augment nga mga fire truck gikan sa kaingud nga kabanwahanan.
