Target sang Senado nga suguran ang imbestigasyon may kaangtanan sa war on drugs sa masunod nga semana ukon antes paman magbalik ang sesyon sang Kongreso sa Nobyembre.
Suno kay Senate President Francis “Chiz” Escudero nga luyag niya nga samtang naka-recess ang kongreso ipatigayon na ang war on drugs investigation bangud ginalauman nga sa pagbalik sang ila sesyon pagatalakayon na ang pondo para sa masunod nga tuig.
Dugang pa sang Senate President nga posible ma-assign ang drug war investigation sa Blue Ribbon committee nga ginapamunuan ni Sen. Pia Cayetano ukon sa Justice Committee nga ginapangunahan naman ni Sen. Koko Pimentel.
Apisar nga nagapabilin paman suno diri nga option ang rekomendasyon ni Sen. Risa Hontiveros nga italana sa Senate Committee of the whole ang pagpatigayon sang imbestigasyon, butang nga wala naman gintugutan sang kadam-an nga mga Senador.
Samtang, natalana naman nga makigkita subong nga semana si Sen. Escudero kanday Sen. Ronald Dela Rosa, Sen. Bong Go kag iban pa nga mga Senador agud isapinal nasambit nga isyu agud masiguro nga patas kag wala sang ginadampigan nga imbestigasyon.
Matandaan nga una na nga ginsuhestyon nanday Sen. dela Rosa kag Go nga maglunsyar sang kaugalingon nga imbestigasyon ang Senado may kaangtanan sa war on drugs ni anay Pangulong Rodrigo Duterte matapos nga maulamid sa nagapadayon nga imbestigasyon sang House Quad Committee.
