Ginkuwestyon ni Cagayan de Oro Rep. Rufus Rodriguez ang katuyuan sang imbestigasyon sang House Committee on Legislative Franchises angut sa National Grid Corporation of the Philippines ukon NGCP.
Para kay Rodriguez, wala sang rason para mangusisa pa ang Kamara matapos ginsiling sang Bureau of Internal Revenue (BIR) kag sa hearing sang House Committee on Ways and Means nga nasunod ukon natuman naman sang NGCP ang responsibilidad nga nakasaad sa prangkisa sini.
Suno kay Rodriguez, ginkumpirmar man ni Energy Regulatory Commission (ERC) Chairperson Mona Dimalanta nga natuman man sang NGCP ang tax responsibilities sini.
Pahayag pa ni Rodriguez, indi man dapat pagbasulon ang NGCP sa lima (5) ka tuig nga pagka-delay sang Mindanao-Visayas Interconnection Project (MVIP) nga nagkaproblema sa right of way issues sa isa ka golf course.
Samtang, nagpasalamat pa si Rodriguez sa NGCP sa pagkumpleto sang MVIP nga amu ang rason nga madamo sang kompanya ang nagabutang sang power generation plants sa Mindanao bangud makabaligya na sila sa Luzon kag Visayas kun may sobra sila nga capacity.
