ROXAS CITY – Nagapati ang Chairman sang Committee on Environment sang Sangguniang Panlalawigan nga wala makalab-ot sa mga hospital officials ang imbitasyon nga ginpadala sa Office of the Governor sa ginpatigayon nga legislative inquiry in aid of legislation sang provincial board.
Ini ang ginpahayag ni Board Member Mateo Hachuela sang mainterview sang Bombo Radyo.
Suno kay Hachuela nga wala makalab-ot sa mga natungdan ang imbitasyon rason nga wala sila makatambong.
Bangud diri, nagpadala na lamang sang sulat ang gobernador sa provincial board nga nagasaad nga indi makatambong ang mga hospital officials bangud posible nga makaapekto man ini sa ginapatigayon nga imbestigasyon sang gintukod sini nga fact-finding Committee.
Apang gin-athag ni Hachuela nga ang tinutuyo sang imbitasyon sa mga hospital officials amo ang mahibaluan kun ano ang mga kakulangan nga gamit, kag mga pasilidad agud mapasanyog ang serbisyo sa mga ospital ilabi na sa Roxas Memorial Provincial Hospital (RMPH).
Bangud diri, posible nga madugangan ang pondo nga igapain sa mga ospital sa pagbakal sang mga dugang mga equipment kapareho nagid lamang sang generator set kag Uninterrupted Power Supply (UPS) agud nga sa tion nga may yara sang emerhensya sang pag-kadula sang power supply malikawan na ang natabo sang Disyembre 25, 2019 kun sa diin may apat ka mga pasyente ang napatay sa Intensive Care Unit sang RMPH.
