Makabig na nga ‘dismissed’ ukon ginbasura ang impeachment case batuk kay Vice President Sara Duterte kung indi matapos ang hearing antes mag Hunyo 30, 2025.
Ini ang gin-insister sang Senate Majority Leader nga si Francis Tolentino sa plenaryo sang Senado.
Suno kay Tolentino, indi pwede nga magtabok sa 20th Congress ang impeachment trial bangud sa kakulangan sang constitutional authority.
Paathag pa sini, 12 ka senador lang ang nabilin sa Kongreso pagkatapos sang eleksyon kag indi ini bastante para makabuo sang quorum.
Samtang, ginpamatukan man ni Senadora Risa Hontiveros ang ginsiling ni Tolentino.
Panindugan sang senadora, sa idalom sang 1987 constitution, ginamanduan ang Senado nga ipadayon sang wala sang atraso ang naumpisahan nga impeachment process.
Nagakabalaka man ang senadora bangud sa paliwat-liwat nga atraso sa proseso sang impeachment trial.
Suno sa iya, sobra na ang paghulat sang mga Pilipino kag nagalaum ang senadora nga ini na ang katapusan nga pagka-atraso.
Apisar pa ginasiling nga ginasuportahan ini sang senadora nga mapapasar ang mga importante nga hagna sa layi antes matapos ang 19th Congress, indi na suno sa iya pwede nga isulon pa ang ila nga mga obligasyon sa idalom sang Konstitusyon.
Hugot pa nga ginsiling sini nga ang ano man nga pag-atrasar sa pag-umpisa sang hearing batuk kay Duterte, isa ka maathag nga paglapas sa Konstitusyon kun sa diin klaro nga kinahanglan gilayon nga umpisan sang senado ang impeachment trial.
