MANILA —Gintugutan sang Senate impeachment court ang anay Sandiganbayan Presiding Justice Amparo Cabotaje-Tang nga magtestigo sa impeachment trial ni Vice President Sara Duterte, bisan pa may pagsupak ang kampo sang bise presidente.
Ginpahayag sang prosecution nga magaserbe si Tang bilang expert witness sa public accountability kag magahatag sang legal nga balangkas sa paghangop kag pag-evaluate sang financial kag documentary evidence nga ipresentar sa masunod nga bahin sang paglilitis.
Apang gin-kontra ini sang defense lawyer nga si Mark Vinluan, nga nagtawag sa pagpresentar kay Tang bilang “improper” bangod wala ini nalakip bilang witness sa pre-trial order. Suno sa depensa, mahimo ini matawag nga surprise witness kag wala man sila nakabaton sang mga dokumento nga gamiton sa iya testimonya.
Ginpabutyag naman ni public prosecutor Rep. Chel Diokno nga indi pagasangkuton si Tang sa espesipiko nga detalye sang kaso ni Duterte, kundi sa mga general principles sang public accountability, lakip ang financial interest kag conflict of interest.
Sa ulihi, ginpagtugot ni Senate President kag presiding officer Sen. Francis “Chiz” Escudero ang testimonya ni Tang, pero ginpaathag nga indi binding ukon conclusive sa Senate impeachment court ang iya mga opinyon. Gintugutan man ang depensa nga i-cross-examine si Tang sa masunod nga adlaw bangod wala siya nalakip sa pre-trial order.
Ang testimonya ni Tang ginhatag samtang ginasugdan sang impeachment court ang pagtalakay sa Article II, nga nagalakip sa alegasyon sang unexplained wealth, mga paglapas nga may kaangtanan sa Statements of Assets, Liabilities and Net Worth ukon SALN, kag pagkapaslawan sa pag-divest sang financial kag business interests ni Duterte.
