Ginaplano sang nagapanguna nga opposition party sa South Korea nga Democratic Party nga magkasa sang impeachment proceedings batuk kay SoKor President Yoon Suk-Yeol sa tion nga indi ini gilayon magbiya sa pwesto kasunod sang madali lamang nga deklarasyon sang martial law sang nakaligad nga adlaw nga gilayon man nga ginbawi.
Sa isa statement, ginaphayag sang opposition party nga kun indi magbiya si Yoon gilayon nga magapatigayon sang impeachment proceedings ang Partido sandig suno diri sa luyag sang mga pumuluyo sang South Korea.
Suno sa koalisyon sang mga mamalidha gikan sa opposition parties, plano nila nga mag-propose sang isa ka bill para i-impeach si Yoon nga pagabotohan sa sulod sang 72 oras ukon tatlo ka adlaw.
Base naman sa isa ka presidential official, nagtan-ay ang chief of staff kag senior secretaries ni Yoon nga mag-resign.
Ini matapos ang deklarasyon ni Yoon sang Martial law nga may katuyuan nga depensahan ang ila pungsod gikan sa North Korea kag pro-North anti-state forces kag protektahan ang ila hilway nga constitutional order, nagtuga ini sang kinagamo kag demonstrasyon kun sa diin pila ka mga tawo ang nagsaka pa sa parliament building pinaagi sa pagguba sang bintana kag makit-an man ang mga nakapalibot nga military helicopters sa kahawaan.
Samtang, mas madamo pa suno diri nga protesta ang ginalauman kun sa diin ginaplano sang pinakadako nga union coalition sa South Korea nga Korean Confederation of Trade Unions nga magkasa sang rally sa Seoul kag nagpahayag nga magaprotesta tubtob sa magbiya sa pwesto si Yoon.
