Ginpahayag ni Gerville Luistro nga padayon gid nga matigayon sa Hulyo 6 ang impeachment trial ni Vice President Sara Duterte bisan pa sang mga panawagan nga madugay ukon ma-postpone ini.
Suno kay Luistro, wala na sang rason agud indi mapadayon ang proseso bangud isa ini ka katungdanan nga ginamando sang Konstitusyon kag kinahanglan nga tumanon sang Senado. Ginpahayag man niya ang iya pagsalig nga tumanon sang mga senador ang ila obligasyon bilang senator-judges sa nasambit nga kaso.
Dugang pa niya, nagapakita ang mga nagakatabo subong nga nagahanda na ang Senado para sa impeachment proceedings, lakip na ang mga kinahanglanon nga pre-trial nga mga tikang antes ang pormal nga pagbukas sang hearing.
Sa pihak nga bahin, ginpahayag man sang bag-o nga liderato sang Senado nga target nila nga masugdan ang impeachment trial sa Hulyo 6 suno sa naunang iskedyul.
Ang impeachment complaint batok kay Duterte nagalakip sang mga alegasyon may kaangtanan sa ginapatihan nga sayop nga paggamit sang pondo sang gobyerno, wala maathag nga manggad, kag iban pa nga mga isyu nga iya naman ginapanginwala.
