ROXAS CITY – Hugot nga ginapatuman sang mga barangay officials ang implementasyon sang checkpoint matapos nga ginpaidalum sa Strict Community Quarantine ang Barangay Libas Roxas City.
Ginpahayag ni Barangay Kagawad Rodillo Curativo nga tuman kaid-id ang ila pag-inspeksyon sa mga nagasulod kag nagaguha sa ila barangay.
Suno sa kagawad nga ginapangitaan sang Home Quarantine Pass ang mga nagasulod kag nagaguha sa barangay sa diin ginapaidalum sa strikto nga proseso sang disinfection.
Sa mga tricycle driver nga wala sang maipakita nga quarantine pass, wala sila ginapahanugutan nga makasulod sa nasambit nga barangay sa diin ang mga pasahero ang ginadul-ong sang mga tanod sa tagsa nila ka mga panimalay.
Samtang, Hugot man nga ginamonitor sang mga barangay officials ang pito ka mga Persons Under Monitoring ukon PUMS kada-adlaw.
Suno kay Kagawad Curativo adlaw-adlaw nga ginamonitor ang body temperature sang pito ka mga PUMS agud mapasiguro ang ila nga kondisyon.
