Gin-athag sang Regional Information Officer sang Land Transportation Office (LTO) Region VI ang implementasyon natuhoy sa pagpahanugot sang pag-angkas kag pagpahamtang sang prototype barrier sa mga motorsiklo.
Sa interview sang Bombo Radyo Roxas kay Riza Otayde ginpahayag sini nga sumugod sa Hulyo 20 maga-umpisa na ang nasambit nga implementasyon.
Ginpahayag ni Otayde nga ginahulat pa nila ang memorandum ukon guidelines nagikan sa Department of the Interior and Local Government ukon DILG may kaangtanan sa pagpahanugot sang pag-angkas sa motorsiklo.
Ini bangud wala pa sang opisyal nga dokumento ukon guidelines kun paano ipatuman ang angkas-motorsiklo sa maghimata kag magkahagugma.
Apang, gin-athag ni Otayde nga istrikto nila nga dakpon ang sin-o man nga indi magsunod sa nasambit nga pagsulundan.
Dugang pa sang natungdan nga pwede man maghimo sang prototype shield basta makapasar lamang sa safety standard kag dapat kaanggid ini sang prototype design sang Bohol Provincial Government nga ginsuhestyon ni Governor Arthur Yap.
Nahibaluan nga base sa nasambit nga prototype design ang barrier ang nakatapik sa motorsiklo samtang ginasuksok naman sang rider ang barrier pag-abot sa design sang Angkas.
Suno pa kay Otayde nga may yara sang nagakaigo nga penalidad ang sin-o man nga maglapas sa nasambit nga pagsulundan ukon makita nga wala sang barrier ukon separator sa ila mga motorsiklo.
Indi naman magnubo sa P1,000 ang nagakaigo nga multa para sa mga indibidwal nga madakpan nga wala nagasunod sa amo nga pagsulundan.
Apang, gin-athag ni Otayde nga indi naman kinahanglan sang barrier kun isa man lang ang nagasakay sa motorsiklo kag wala ini sang angkas.
Samtang, tubtob sa Hulyo 19 na gid lamang ang gintalana nga plaso para sa mga motorcycle riders agud maka-install sang barrier sa ila motorsiklo.
