ROXAS CITY – Hugot karon ang mga ginapatuman nga implementasyon sang magkatuhay nga mga kabarangayan sa siyudad sang Roxas agud nga malikawan ang paglapta sang Coronavirus Disease 2019 (COVID19) pandemic.
Sa paglibot sang Bombo Radyo News Team naobserbahan ang pila ka mga kabarangayan nga nagapatuman sang health community quarantine kalakip na diri ang Barangay Dayao, Libas kag Tanque sining siyudad kun sa diin nakapagkit sang dugang nga mga Persons Under Monitoring (PUMs).
Bangud diri, nangin matawhay ang palibot sa nasambit nga mga barangay kasunod man sang ginpatuman nga curfew hours sa probinsya sang Capiz sandig sa implementing guidelines sang Memorandum Order No. 11, series of 2020 ni Capiz Governor Esteban Evan ‘Nonoy’ Contreras.
Makit-an nga halos wala na sang mga tawo, salakyan kag motorsiklo nga nagalagaw ukon nagalakat sa mga karsada magluwas na lamang sa mga otoridad nga nagabantay sa palibot sang siyudad.
Mahibaluan nga takna alas 6 sang kasisidmon nagasugod na ang pagpatigayon sang mga checkpoints sa mga nagasulod kag nagaguwa sa border sang tagsa ka mga barangay kag nagapatigayon man sang information dissemination ang mga otoridad.
