Pagahugton na ang implementasyon sang Ayuda sa Kapos ang Kita Program (AKAP) program sang Department of Social Welfare and Development (DSWD) subong nga tuig 2025.
Ini ang gin-athag ni Department of Budget and Management (DBM) Undersecretary Goddess Hope Libiran kasunod sang desisyon ni Pangulong Ferdinand Marcos Jr. nga ibutang sa conditional implementation ang pila sa mga proyekto nga nakasaad sa 2025 national budget.
Suno kay Libiran, ginhimo ang tikang agud masiguro nga mag-angkon sang klaro nga guidelines kag Implementing Rules and Regulations (IRR) antes mapaguwa ang pondo.
Ang desisyon nga ini ang sabat sa mga hinyo sang publiko nahanungod sa ginapahayag sala nga paggamit sang pondo sadtong mga nakaligad nga tuig kun sa diin ginpahayag nga ginagamit pa ini kun kaisa sa kaugalingon nga interes sang mga politiko.
Kaangut sini, ginmanduan ang mga ahensya kasubong sang Department of Labor and Employment (DOLE), National Economic and Development Authority (NEDA), kag DSWD nga magdihon sang maid-id nga sistema para sa tama nga implementasyon sang programa.
Sa idalom sang bag-o nga sistema, indi na mahimo nga basta-basta ipanghatag ang pondo nga wala sang klaro nga proseso kag accountability.
Luyag man sini nga masiguro nga ang mga benepisyaryo sang AKAP program ang matuod-tuod nga mga nagakinahanglan kag ang pondo ang magamit sang husto.
