Ginaduso sang Sangguniang Panlungsod sang Roxas City ang pagpatuman sang bag-o nga mga traffic rules agud mas mapaayo ang pagdumala sang trapiko kag kaluwasan sang mga motorista kag pedestrian sa syudad.
Sa interview sang Bombo Radyo kay Roxas City Councilor Fernando Luis Viterbo, iya ginpahayag nga kinahanglan nga mapatuman sing husto ang mga patakaran sa trapiko kag mga regulasyon base sa nagabag-o nga sitwasyon sang trapiko sa Roxas City.
Matandaan nga may mga ordinansa na nga ginpasar ang Sangguniang Panlungsod nga may kaangtanan sa pagdumala sang mga salakyan.
Lakip diri ang Ordinance No. 035, Series of 2025, nga nagadumili sa paglabay sang mga salakyan nga may gross weight nga 3.5 tons ukon sobra pa sa Capiz/Roxas City Bridge.
Dugang pa sini, may yara man sang mga ordinansa nga nagapatuman sang temporary road closures sa pila ka mga okasyon kag aktibidad sa syudad, nga kabahin sang traffic management sang lokal nga panguluhan.
Ginalantaw naman sang Sangguniang Panlungsod ang padayon nga pagpaayo sang traffic regulations agud mangin mas organisado ang dalagan sang trapiko kag masiguro ang seguridad sang mga nagagamit sang dalan sa Roxas City.
