Ginsuguran na ang implementasyon sang dugang nga sweldo para sa mga empleyado sang gobyerno samtang nag-umpisa na nga ipaguwa sang Department of Budget and Management (DBM) ang mga nakapain nga pondo para diri.
Ini ang ginkumpirmar ni DBM Sec. Amenah Pangandaman kasunod sang pagperma ni Presidente Ferdinand Marcos Jr. sa Executive Order No. 64 sadtong Agosto 2, 2024, nga nagaapruba sa Salary Standardization Law VI para sa tanan nga mga civil service personnel.
Suno sa DBM, kahapon nga adlaw, naglab-ot na sa P31.93 billion ang napaguwa para sa 257 nga departamento kag ahensya, samtang 58 nga iban pa ang sa karon nga ginaproseso.
Base sa pinakabag-o nga datos sang DBM, ang mga pondo para sa salary adjustments ang napaguwa na sa nagkalain-lain nga mga departamento kag ahensya kasubong sang Congress, Office of the President, Office of the Vice President, Department of Agriculture, DBM, State Universities and Colleges, Department of Education kag iban pa.
