ROXAS CITY – Mahimo na nga masuguran ang mga proyekto nga yara sa idalum sang superbisyon sang Department of Public Works and Highways (DPWH) Capiz 1st Engineering District sa syudad sang Roxas.
Ini ang ginpahayag ni Engr. Julius Abela, hepe sang Maintenance and Construction Division sang DPWH Capiz 1st Engineering District sang mainterview sang Bombo Radyo Roxas.
Suno kay Abela nakaangkon sang kahigayunan nga maka-estorya sanday Mayor Ronnie Dadivas kag district engineer Randolfo Melosantos sang nag-courtesy call ang naulihi sa alkalde sang syudad.
Ginhatagan sang sabat kag paathag ni Engr. Melosantos ang mga palamangkutanon sang alkalde angut sa proseo kag protocol nga ginasunod sang ahensiya pag-abot sa implementasyon sang mga proyekto nga ginpundohan sang gobyerno nasyunal.
Kalakip sa gindiskusyunan ang mga project proposal, project implementation sa rehabilitasyon kag pagpa-konkreto sa mga karsada sa Atila Balgos-Legaspi road, Burgos-Dayao road sa atubang sang Capelco kag Lonoy, Roxas City.
Ginapanindugan ni Abela nga hugot nga ginadumilian ang pag-realign sang national fund sa iban nga proyekto bangud ginpaidalum na sa validation ang nasambit nga proyekto antes pa man ginpunduhan ini sang gobyerno nasyunal.
Magluwas diri may criteria nga ginasunod sa pag-identify sa mga priority project.
Pag-abot naman sa mga local projects, gina-implementar ini sang ahensiya kun may pondo gikan sa talatapan sang mga kongresista.
Samtang nagpapasar naman sang resolusyon ang City Council nga kasubong nagahatag na sang go signal para masuguran na ang implementasyon sang proyekto.
