ROXAS CITY – Nagdangop sa Bombo Radyo ang barangay kagawad sang Barangay Intungcan, Pontevedra, Capiz agud ipalab-ot ang ginapahayag kwestiyunable nga implementasyon sang pagkaayo sang streetlights kag drainage sa ila nga barangay.
Suno kay Barangay Kagawad Eufemia Ramon, chairperson sang Committee on Appropriations sang konseho sang nasambit nga barangay, ila sadto anay nakasugtan sa konseho nga ipaguwa ang pondo sa 1st quarter sang development fund para sa nasambit nga mga proyekto bangud sang kahalitan nga natuga sang pagpanalasa sang bagyo nga Ursula sang nakaligad nga tuig.
Apang natingala si Ramon sang wala may ginapapirmahan sa iya nga mga dokumento antes mag-withdraw sang pondo.
Una nga nag-withdraw suno diri sang kapin P50, 000 para sa rehabilitasyon sang streetlight kag ginsegundahan sang pag-withdraw sang dugang nga P50, 000 para naman sa pagkaayo sang drainage.
Ginkatingala ni Ramon nga kasubong wala na-implementar sang husto ang nasambit nga mga proyekto bangud wala man siya sang may nakita nga mga materyales nga gin-deliver sandig sa purchase order.
May mga sitio man suno diri nga wala gihapon napasigahan sang streetlights kag wala man masolusyunan ang problema sa drainage.
Bangud diri, ginkwestiyon niya si Punong Barangay Jorge Casipit Jr. apang indi man ini mapaathag sang kapitan kag naghambal lamang nga hatagan siya sang pila ka adlaw para mapaathag sa ila ang ginkadtuan sang pondo.
Panindugan ni Ramon nga luyag lamang sini nga may yara sang transparency agud indi siya pagpatu-patuan nga may ginaganar sa pondo nga siya mismo ang wala sang ihibalo kun diin nagkadto ang ila ginpaguwa nga pondo.
Gindugang pa ni Ramon nga iya ginkakibot nga matapos niya gin-usisa si Casipit natuhoy sa amo nga pondo, nagpatawag ini sang sesyon sa ila nga mga miyembro sang konseho.
Nakibot na lamang ang kagawad nga sa ginpatawag nga sesyon ni Casipit, ginpangre-shuffle sila sang committee chairmanship kag siya ang ginkakas bilang pinuno sang Committee on Appropriations.
