ROXAS CITY – Pagatawgon na nga Primay Care Facility (PCF) ang anay Rural Health Unit (RHU) ukon City kag Municipal Health Office.
Ini ang ginkumpirmar ni Dr. Ramon Alex Nolasco, pinuno sang Capiz Provincial Health Office, sang mainterview sang Bombo Radyo.
Suno diri, ang PCF ang magahatag sang additional services sa mga pumuluyo, nga yara sa lebel sang kabanwahanan kaangay sang minor surgery, x-ray kag laboratory, magluwas sa naga-eksister nga serbisyo kapareho sang konsultasyon, pagpangbakuna kag health education.
Ini ang nakasaad sa idalom sang Universal Healthcare Law, apang indi pa ini masarangan sang kabanwahanan, bangud amat-amat pa nga naga-adoptar ang probinsya sini nga programa.
Bangud sini, kinahanglan diri ang bulig sang provincial government, rason nga nagpatigayon sang courtesy call kay Governor Fredenil Castro, ang Association of Municipal Health Officers of the Philippines (AMHOP) Capiz Chapter, pinaagi sa hinyo sang ila presidente nga si Dr. Winfred S. Rivera.
Nangin positibo man ang nasambit nga pakighinun-anon bangud suno kay Nolasco nga lakip ini sa prayoridad sang gobernador para sa mga Capiznon, pag-abot sa pag-amlig sang ikaayong lawas.
Nahibaluan nga kun matigayon ini nga programa, indi na kinahanglan nga magpadulong pa sa ospital agud magpalaboratoryo ukon magpaidalom sa menor nga operasyon bangud mangin available ini sa mga Primary Care Facilities sa kabanwahanan.
