Ginalantaw sang mga kapulisan nga hinubog nga istorya ang rason sang indi pag-intindihanay duha ka mga lalaki nga nagresulta sa pagpangbuno gamit sang lansang sa Barangay Malocloc Norte, Ivisan, Capiz.
Ang biktima amo si alyas Dan, 25-anyos, samtang ang suspek naman amo si alyas Rex, 18-anyos, lunsay residente sang nasambit nga lugar.
Sa interview sang Bombo Radyo kay Police Major Rile Villariez Jr., Chief of Police sang Ivisan Municipal Police Station, iya ginpahayag nga magkaupod nga naga-inom-inom ang duha antes natabo ang insidente.
Suno kay Villariez, nagbaisay ang duha nga nagresulta sa pagtapungolay.
Apang lipod sang ihibalo sang biktima nagkuha sang lansang ang suspek kag ginbuno ang ini sa nawala nga bahin sang iya lawas.
Gilayon nga gindala sa ospital ang biktima agud mahatagan sang nagakaigo nga pagbulong.
Samtang, natalana nga maga-areglohanay ang magtimbang nga bahin, apang kinahanglan sa gihapon sang suspek nga pagasabton ang galastuhan sa pagpabulong sang biktima.
