ROXAS CITY – Gintadlong sang chairman sang Committee on Appropriations sang Sangguniang Panlalawigan ang sala nga impormasyon nga nagalapta angut sa ginasiling pagpabor sa kontrobersiyal nga mga investment scheme sa probinsiya sang Capiz.
Sa interview sang Bombo Radyo kay Board Member Jonathan ‘’Sonny’’ Besa, ginpahayag nga wala ini sang gin-endorso nga investment company kag wala naga-encourage nga mag-invest.
Ginklaro ni Besa ang ginbuy-an nga pahayag kun matood nga padayon ang pay-out sang mga investors kag bangud pandemya, makabulig ini bisan paano sa pangabuhi sang mga pumuluyo.
Suno kay Besa nga wala ini nagkulang sa pagpahanumdum sa mga nagapalapit sa iya sadto nga may yara sang investment nga siguraduhon kun legal ang operasyon sang investment company kag dapat extra money ang gamiton kag indi hard earned money kag kabigon nga sugal ang ginsudlan sang kuwarta.
Apang bulan pa lamang sang Pebrero kag yara sa kainitan ang isyu, naghinun-anon na sila sa provincial board kun ano ang ila mangin tikang sa mangin epekto sa ekonomiya kag banking system sa syudad kag probinsiya bangud kadam-an sa mga investors ang nagwithdraw sang ila kuwarta kag iban ang nagprenda sang ila propedad kag nagpangbaligya sang kasapatan agud lamang ma-invest sa double your money investment scheme.
Nagapati si Besa nga binilyon ka pesos ang nadula sa Capiz bangud sa kagustuhan sang mga investors nga ma-doble ang ila kuwarta kag ginhingalitan naman ini sang mga tuso nga mga CEO’s sang investment companies.
Apang nadismaya lamang sang mauntat ang pay-out kag ginhatagan sang false hope ang mga investors.
Bangud sa natabo, naghimo sang pila ka mga tikang ang Sangguniang Panlalawigan agud mabuligan ang mga investors kasubong kay BM Eleuper ‘’Bulilit’’ Martinez nga naghatag sang legal assistance sa mga na-biktima sang investment company, nagpatigayon man sang diskurso pribilihiyo si BM Ricky Martin sa diin ginaganyat ang mga CEO’s sang investment companies nga ibalik na lamang ang kapital sang mga investors.
Isa man sa legislative intervention nga pagahimoon sang sangguniang panlalawigan ang pagdihon sang ordinansa nga magatukod sang task force nga magatutuk sa magtuhaw nga mga investment company agud indi na masulit pa ang pagpanunto sa mga Capizeño.
Samtang nagpahanumdum si Besa sa publiko nga antes buy-an ang kuwarta sa anuman nga investment company, siguraduhon kun legal ang operasyon kag gamiton lamang ang extra ukon sobra nga kuwarta kag likawan nga magpangutang.
