PANAY, CAPIZ – Ginpakigbahin ni Monsignor Policarpio John. Luza, parish priest sang Sta. Monica Parish Church sa banwa sang Panay ang kaimportansya sang pagsaulog sang paskwa ukon pagkatawo ni Ginuong Hesukristo.
Suno kay Msgr. Luza nga nakaangdan na kada-tuig sa kalendaryo sang aton simbahan ang Disyembre 25 amo ang adlaw sa diin ang aton Ginuong Hesukristo natawo sa kalibutan kag isa ka espesyal nga adlaw para sa tanan nga mga Kristiyano.
Mahibaluan nga kabahin na sang kultura kag tradisyon sang mga Pilipino ang pagsimba sa Mise de Gallo ukon Misa Dulom sa diin ginapatigayon ini sa tagsa ka mag-aga.
Nagasugod ini sa adlaw sang Disyembre 16 tubtob 24 sa diin may yara sang siyam ka-adlaw ang mga kotoliko sa pag novena antes ang kaadlawan sang manunubos sang kalibutan.
Ginpahayag ni Luza nga ang pagkatawo ni Kristo kag ang presensya sang Ginuo sa aton tawhanon nga kabuhi amo ang sentro sang aton Kristiano nga selebrasyon.
Ang mga parol, lights, family traditions, church liturgies, crib amo ang mga mayor nga mga simbolo nga nagadugang kag nagapabakod sang aton pagtuo kag tungod sang iya pagkatawo, ang presensya sang Ginuo yara sa tunga sang aton pang adlaw- adlaw nga mga eksperyensya.
Dugang pa ni Luza nga ang paskwa amo ang pagkatawo sang aton Ginuo nga isa ka langitnon kag makatalanhaga nga hitabo sa kalibutan.
