ROXAS CITY – Ginpatpat sang provincial information officer sang probinsiya ang katuyuan kag importansiya sa paggamit sang ‘’Home Quarantine Pass” matapos nga istrikto na nga ginpatuman ang enhanced community quarantine sa Capiz, bangud sa coronavirus disease (COVID-19).
Ginpahayag ni Atty. Atlas Catalan, nga ginba-se ang home quarantine pass sa memorandum order No. 43 nga sandig sa Executive Order No.12 Series of 2020.
Ginatugyan sa mga Local Government Units (LGU’s) kag Barangay Officials ang pagprodyuser kag pagpanagtag sini sa nasakupan nga mga pumuluyo agud magamit sa ila pagguwa sa balay.
Kinahanglan nga ang mabutang nga pangalan sa magauyat sa home quarantine pass ang iya ka mayor nga miyembro sang pamilya kalakip sang magaserbe nga alternate sini nga magabulos sa iya.
Sarang ini magamit sa pagguwa sa pagbakal sang kinahanglanon sa ila balay, kun magwithdraw sa banko, magbayad sang bills sa kuryente kag tubig kag iban pa nga transaksyon kag sa tion sang emerhensiya.
Apang klaro sa pagsulundan nga ang magauyat sini ang indi Person Under Monitoring ukon Person Under Investigation ukon immuno comprise ukon may balatian.
Ginpahangup man ni Catalan sa publiko nga libre ang home quarantine pass nga ginaprodyuser kag ginapanagtag sang mga opisyales sa barangay.
Makabig na nga epektibo ang laye kun natigayon na nga mapanagtag sang mga barangay officials sa ila mga nasakupan ang home quarantine pass.
Samtang wala sang format nga ginasundan nga gikan sa gobyerno probinsiyal ang pagprodyuser sang home quarantine pass sa kabaranggayan.
Ang importante lamang nga may selyo sang munisipyo, barangay, nabutang ang pangalan sang miyembro kag alternative sini, pirma sang barangay kapitan kag kinahanglan nga may control number, agud maisip ang mga ginhatagan sini.
