Ginsiguro sang Manila International Airport Authority (MIAA) nga ang mga airport employee nga maapektuhan sang pagsapribado sa Ninoy Aquino International Airport (NAIAA) pagahatagan sang mga insentibo magluwas sa dugang nga sweldo sa ila pagsaylo sa New NAIA Infrastructure Corp.
Mahibaluan una na nga ginsiguro sang Department of Transportation (DOTr) nga indi madulaan sang trabaho ang mga empleyado sa MIAA sa tion nga i-turn over sang gobyerno ang operasyon kag maintenance sang NAIA sa New NAIA Infrastructure Corp. sa Setyembre 14.
Sa isa ka televised briefing ginsiling ni MIAA Spokesperson Atty. Chris Bendijo nga ang mga apektado nga empleyado pagahatagan sang 25 percent increase sa ila basic salary.
Suno kay Bendijo, nagpirma na sa employment contract ang NAIA personnel nga ang trabaho masaylo sa private concessionaire.
Matandaan una na nga ginsiling sang DOTr nga indi magnubo sa
77.5 percent nga mga empleyado sang MIAA ang ginbaton ang trabaho nga gintan-ay sang San Miguel-led NNIC.
Samtang, ginsiling naman ni Transportation Undersecretary Roberto Lim nga ang airport police kag iban pa nga kinahanglanon nga empleyado sang MIAA magapabilin bilang organic personnel.
