Handa na ang Incident Management Team (IMT) nga magabantay kag magaresponde sa mga posible nga emerhensiya sa tion sang Roxas City Invitational Tournaments 2026.
Ang IMT ginabug-usan sang mga personnel halin sa City Disaster Risk Reduction and Management Office (CDRRMO), Philippine National Police (PNP), Bureau of Fire Protection (BFP), kag Traffic Management Unit (TMU) nga igadeploy sa nagkalain-lain nga venue sang torneo.
Una nga katuyuan sang pagdeploy sang IMT amo ang pagpasiguro sang seguridad kag kaayuhan sang mga atleta, teams, delegates, organizers kag spectators sa bug-os nga tion sang paghiwat sang kompetisyon.
Handa man ang team nga magresponde gilayon sa tion sang emerhensiya ukon iban pa nga insidente nga mahimo matabo.
Gindumala ang Incident Management Team Send-off Ceremony bilang pagpreparar sa mga personnel nga magaserbisyo kag magabantay sa nagkalain-lain nga aktibidad sang Roxas City Invitational Tournaments 2026.
Sa amo nga okasyon, ang bata ni Mayor Dadivas nga si Miggy ang nagrepresentar sa iya bilang pagsuporta sa mga miyembro sang IMT kag sa ila nga katungdanan sa pagsiguro sang kaluwasan sang tanan nga magapartisipar sa torneo.
Ginapaabot nga paagi sa koordinasyon sang CDRRMO, PNP, BFP kag TMU, mangin organisado, hilway kag luwas ang pagpatigayon sang Roxas City Invitational Tournaments 2026.
