ROXAS CITY – Nagpatigayon sang eleksyon ang National Executive Committee sang partido Liberal, agud matal-osan ang mga nagresign nga mga anay miyembro sang ila partido.
Ini ang ginkumpirmar ni Capiz 1st district Congressman Emannuel ‘Tawi’ Billones Sr., sang mainterview sang Bombo Radyo.
Suno diri, matapos ang eleksyon sang Mayo 2022, sang nagbiya bilang President si former Senator Francis ‘Kiko’ Pangilinan kag ang party-chairman nga si former Vice President Leni Robredo, nadisesyunan sang ila partido nga magpatigayon sang eleksyon, kag nakasugtanan sang mga ini nga ipahamtang si Albay Rep. Edcel Lagman bilang bag-o nga presidente.
Ginpakigbahin man ni Billones nga sang 2016, may 220 ka mga Kongresista nga sa idalom sang Liberal ang yara sa Kongreso, apang sa masunod nga eleksyon nangin 24 nalang ang mga ini kag sa karon nga Marcos administration 8 nalang ang nabilin, kalakip na ini.
Apang, indi luyag sang walo ka mga nabilin nga tawgon sila nga oposisyon, bangud indi buot silingon nga Liberal ang ila partido, oposisyon na sila.
Aminado man ini nga magamay nalang ang ila numero sa karon nga administrasyon, apang madamo man sa gihapon ang nagapangibabaw sa ila, kaangay nalang suno diri, kay Roxas City Mayor Ronnie Dadivas.
Gintuad man sini nga ang kabuhi sa pulitika kaangay sa indi mapaktan, kag gin-aku sang Kongresista nga ginapangulayagan man ini sang iban nga partido, apang para sa iya, sa karon, desisyon sini nga magpabilin sa partido liberal.
