ROXAS CITY – Kumpirmado nga madamo sang indi mapuslan nga mga drainage system sa kabaranggayan nga na-construct sa syudad sang Roxas.
Ginpahayag ni City Engineer Noel Laminares nga natukiban ang kapaltahan sang nagligad nga administrasyon matapos nagpatigayon sang inspeksyon kag gintsekyar ang mga drainage ba-se sa mandu ni Mayor Ronnie Dadivas agud matumod ang ginhalinan sang pagbaha nga nagahatag huol sa mga pumuluyo.
Suno sa inhenyero natukiban sini nga substandard ang drainage nga gin-construct sa diin ginhimo sini nga ehemplo ang Barangay Gabuan nga ginabaha na sa karon.
Gintumod man sini ang Barangay Baybay nga wala ginsunod ang standard sang isa ka drainage.
Kun ini ang pasugtan suno kay Laminares nga liwaton sini ang mga drainage nga indi mapuslan agud masolusyunan ang problema.
Samtang aminado naman si City Councilor Midelo Ocampo nga kinahanglan sang daku nga pondo sa pagpakaayo sa drainage sa Barangay Tiza, sining syudad.
Ini ang nangin findings matapos nga ginsuguran na ang declogging sa drainage sa nasambit nga barangay.
Nahibaluan nga indi maka-diretso ilig sa drainage ang tubig gikan sa mga pamalay bangud sa pila ka mga kalay-uhon.
