ROXAS CITY – “Indi niyo ako pag-i-underestimate!”
Ini ang matigdas nga mga tinaga sang punong barangay sang Barangay Milibili, Roxas City sa iya mga kritiko kag nagakomparar sa iya sa iya ginbuslan nga si anay punong barangay kag karon City Councilor Midelo Ocampo.
Suno kay Punong Barangay Annabelle Roxas, madamo na siya sang napamatud-an nga nahusay nga problema sang ila barangay nga pwede matsekyar sang mga nagaduda sa iya bangud kumpleto man ini sa mga dokumento.
Ginpahayag sini nga ang iya patakaran bilang iloy sang barangay ang nasandig sa interes sang mga pumuluyo nga amo ang nagbutang sa iya sa pwesto.
Panindugan sini nga wala siya nagahandom nga magsikat ang ila barangay sa anuman nga mga kompetisyon nga pasakupan bangud ang importante para sa iya nga maserbisyuhan lamang ini sang maayo ang mga tawo.
Nagpasalig man ini sa mga pumuluyo sang nasambit nga barangay nga himuon niya ang tanan sini nga masarangangan agud makaserbisyo sang maayo.
Samtang, gin-ako man ni Roxas nga nakapalapit ini sadto kay Ocampo kag nakasugid natuhoy sa pagka-delete sang pila ka dokumento sa ila barangay antes pa siya nagtal-os sa pwesto nga ginbiyaan sang konsehal.
Apang suno diri nga ginhambalan lamang siya ni Ocampo nga sala niya man ini bangud ginpang-islan niya ang iban nga opisyal sang barangay.
Wala naman nagsabat pa si Roxas bangud man sa pagrespeto sini kag Ocampo.
Panindugan sini nga iya man diskresyon ang pagpili sang mga opisyal base sa iya ‘trust and confidence’.
Bukas man ini sa kun sinuman ang luyag tsekyaron ang mga dokumento agud usisaon kun sa diin nagkadto ang nadag-an nga P350, 000 sang ila barangay sang nagpasakop sa kompetisyon sang DILG.
Panindugan sini nga ‘well-documented’ ini tanan bangud indi sini luyag nga mahigkuan ang iya pangalan kag administrasyon.
Nag-apelar naman ini sa anay barangay secretary nga si Melchor Duran nga mag-move-on na kag untatan ang pagpaguha sang mga kabutigan nga mga pahayag.
Nagpahayag man ini nga bukas siya sa pagpakighinala sa iya ginbuslan nga si Councilor Ocampo bangud dako man ang iya respeto diri kag luyag sini nga mapabilin man ang ila maayo nga relasyon.
