Plano nga mas palaparon sang Capiz Police Provincial Office ang inisyatibo sang paghimo sang groupchat sang mga kapulisan kag mga manunudlo.
Sa interview sang Bombo Radyo Roxas kay Police Major Rachelle Garnica, Public information officer sang Capiz Police Provincial Office, iya ginpahayag nga kabahin ang nasambit nga tikang sa mas masangkad nga police visibility sa mga buluthuan sa bug-os nga probinsya.
Suno kay Garnica, tinutuyo sang amo nga group chat agud mahibaluan kag ma-monitor ang sitwasyon sang mga buluthuan kag gilayon mapalab-ot sa kapulisan pananglitan may yara sang mga concern ang manunudlo.
Pahayag pa niya, may pila nga mga manunudlo ang nagapangduha-duha apang padayon ang ila sini kampanya sa pagiya, pagbantay kag pagpabilin sang seguridad.
Nagpahanumdom man ang natungdan sa kooperasyon sang mga manunudlo, estudyante kag ginikanan nga mangin aligmat sa palibot kag pananglitan may matalupangdan nga makaduluda gilayon nga ipalab-ot sa ila.
