Iginiit sang Armed Forces of the Philippines ukon AFP nga wala sang partisipasyon ang mga Marine sa nagluntad nga insidente sang pagpinalupok sang pusil sa Senado sang Miyerkules sang gab-i.
Suno kay AFP Chief General Romeo Brawner Jr., ang mga Marine nga nakita sa sulod sang Senado antes natabo ang insidente yara lamang didto para sa regular nga security duty kag wala nagpabuto sang armas.
Ginpahayag man ni Brawner nga ang mga miyembro sang Marine Security and Escort Group ukon MSEG ginadestino sa pagbantay sang mga importante nga opisina sang gobyerno pareho sang Senado, Kamara, kag Department of Foreign Affairs.
Samtang, ginpahamtang man sang AFP nga wala sila nagakabalaka nga mahimo ini nga rason sang destabilization ukon kagamo sa hanay sang militar bangud padayon nga ginamando sa mga soldado nga magpabilin nga kalmado, disiplinado kag propesyonal.
