Isa ka sex toy ang ginhaboy liwat sa court sa katapusan nga quarter sang hampang sang Women’s National Basketball Association (WNBA) sa diin ginlutos sang Atlanta Dream ang Chicago Sky, 86-65, sang Huwebes (oras sang Estados Unidos) sang gab-i.
Ang kaanggid nga mga insidente ginreport sa iban nga mga hampang pareho sang sa Atlanta (Hulyo 29), Chicago (Biernes), kag Los Angeles (Martes).
Suno sa pulis, isa pa ka sex toy ang ginhaboy sa hampang sa Atlanta, apang indi maathag kon nakalab-ot ini sa court.
Matandaan nga isa ka lalaki ang gin-aresto sa College Park, Georgia, sang Sabado matapos nga gin-alegar nga naghaboy sang sex toy sa hampang sang Atlanta Dream batok sa Golden State Valkyries sang Hulyo 29, kag liwat batok sa Phoenix Mercury sang Biernes.
Ginpasakaan sang kaso nga disorderly conduct, criminal trespassing, public indecency, kag indecent exposure ang suspek.
Samtang, sa Phoenix, isa naman ka lalaki ang nadakpan matapos naghaboy sang sex toy sa arena, nga naigo ang isa ka tumalan-aw. Suno sa pulis, ang 18-anyos nga suspek ginpasakaan sang kaso nga pagpang-atake, disorderly conduct, kag public display sang sexually explicit material.
Ang WNBA nagpaandam nga ang sin-o man nga madakpan nga nagahaboy sang bisan ano sa court mahimo nga mag-atubang sang minimum nga isa ka tuig nga pagdumili kag posible nga pagkakulong.
