ROXAS CITY-Padayon nga ginapatuman ang ‘Intelligent Lockdown’ sa pungsod Netherlands kasunod sang pagsaka sang kaso sang covid-19 disease.
Ini ang ginkumpirmar ni Tess Ramakers Badana, Bombo International Correspondent sang mainterview sang Bombo Radyo.
Ginpahayag ni Badana nga nagapabilin nga sarado ang mga kalan-an, parks, cafes kag buluthuan humalin sang nagsugod ang pagpatuman sang intelligent lockdown sa pungsod sang tinalikdan nga bulan sang Marso.
Gindugang pa ni Badana nga ang mga essential establishments na gid lamang ang nagapabilin nga bukas.
Kadungan sang pagsarado sang mga non-essential establishments pila ka mga undocumented filipino workers ang nadulaan sang trabaho apang suno kay Badana wala nagkulang ang gobyerno sa paghatag sa ila sang bulig-pinansyal.
Samtang hugot nga ginpatuman ang pag-obserbar sang social distancing apang indi mandatory ang pagsuksuk sang facemask sa pungsod.
Natalana naman nga magbalik sa normal kag magabukas ang mga buluthuan sa maabot nga Mayo 20, 2020 apang limitado gid lamang ang mga estudyante nga masulod sa eskwelahan.
