ROXAS CITY, CAPIZ- Naglab-ot sa Intensity IV ang nabatyagan nga pagtay-og sa Roxas City kag sa iban pa nga kabanwahanan sang Capiz matapos ang 6.7 magnitude nga linog nga nag-igo sa Bogo City, Cebu kagab-i.
Sa interview sang Bombo Radyo Roxas kay Roxas City Mayor Ronnie Dadivas, ginsiling sini nga gilayon nagpatigayon sang inspeksyon ang City Disaster Risk Reduction and Management Office (CDRRMO) sa ila nga mga establisimyento kag mga buildings sa syudad. Wala man sang may narekord nga kahalitan sa mga imprastraktura.
Dugang pa ni Mayor Dadivas, magapadayon subong nga aga ang inspeksyon sa mga pang-publiko kag pribado nga establisyemento agud masiguro ang kaluwasan sang mga pumuluyo.
Pila man ka mga buluthuan sa syudad ka sa probinsya sang Capiz ang nagdeklara sang suspensyon sang klase bilang paghalong.
Pahanumdom sang alkalde sa publiko nga magpabilin nga kalmado kag likawan ang pagpalapta sang sala kag patalang nga mga umiwas impormasyon, usisaon ang mga puluy-an kag buildings kun may halit ukon naglitik, kag mangin aligmat sa posible nga aftershocks.
Padayon ang pag-monitor sang mga otoridad agud masiguro ang kaluwasan sang mga Capizeño.
