ROXAS CITY – Ginpatpat ang kaundan sang Executive Order No. 11, series of 2020 nga ginpapanaog ni Capiz Governor Esteban Evan ‘Nonoy’ Contreras sa ginpatigayon nga Inter-Agency Task Force Meeting may kahilabtanan sa coronavirus disease (COVID-19).
Ang nasambit nga sinapol ang gintambungan sang mga opisyales kag magkatuhay nga ahensiya sang gobyerno.
Una diri, ginpatpat ang kaundan sang Executive Order No. 10, series of 2020 nga nagamandu sang pagpatuman sang estrikto nga quarantine procedure sa mga nagasulod sa probinsiya nga gikan sa mga pungsod ukon lugar nga infected sang amo nga virus.
Ginpatpat man diri ang kaundan sang Memorandum Order No. 36, series of 2020 nga amo ang implementing guidelines sang pagpatuman sang Executive Order No. 11, series of 2020.
Diri nasaad ang pila ka mga pagsulundan nga dapat ipatuman ilabi na sa pag-estrikto sa mga nagasulod sa border checkpoints kag quarantine procedures.
Sa amo nga sinapol naghinyo naman ang hanay sang Capiz Police Provincial Office sang dugang nga mga thermal scanners agud mas mapadasig ang ila nga pagpatuman sang health checkpoints sa magkatuhay nga mga border entries sa probinsiya.
Sa amo nga sinapol, wala naman malikawan ni Board Member Thea Faith Reyes nga tawgon ang atensiyon ni Capiz Police Provincial Office Director Julio Gustilo Jr. kag usisaon sa ginahimo sang mga kapulisan sa mga Persons Under Monitoring (PUM’s) sa suno diri padayon nga nagapalapta sang kagaw sang COVID-19.
Isa sa gintumod ni Reyes amo si Provincial Administrator Edwin Monares kag isa pa ka matag-as nga opisyal sang probinsiya nga wala sini ginhingadlan.
Suno pa kay Reyes nga kun hungdon lamang, mangin si Gustilo ang makabig naman nga PUM bangud nakasalamuha sini ang mga PUM nga iya ginatumod.
Apang panindugan ni Gustilo nga kun magapaidalom man sila sa self-quarantine, wala na sang magahulag agud magbulig kag mag-implementar sang mga lihok sang gobyerno sa kampanya batuk sa amo nga balatian.
Nauntat naman ang pagsabtanay sang duha sang ginpatung-an ini ni Provincial Health Office Dr. Leah Del Rosario kag nagpahayag nga may yara sang proper venue para sa amo nga isyu.
