Pormal na nga naghingyo ang defense team ni anay Presidente Rodrigo Duterte sa International Criminal Court (ICC) para sa interim release sang anay Presidente bangud sa gina-alegar malawig nga delay kag unresolved logistical issues sa pag-assess sang iya fitness to stand trial.
Suno kay Atty. Nicholas Kaufman, ginakilala nila ang mga panikasog sang Registry sa paghanda sang mga gin-redact nga mga materyales para sa pagbinagbinag sang Pre-trial Chamber.
sa pihak nga bahin, nagrekomendar sang dugang nga mga kondisyon sa pagsabat sang pila ka mga kabalaka nahanungod sa posible nga paghilway sa anay presidente, mga butang nga wala nalakip ukon gin-redact sa pag-file.
Ginpahayag man sini nga indi dapat magpabilin sa ICC detention facility ang anay presidente samtang ginapatigayon ang proceedings angut sa iya ikaayong lawas, ilabi na nga ginalauman nga madugay pa ini.
Ginpasalig naman sang depensa nga indi makaapekto sa nagapadayon nga trial ang paghilway kay Duterte.
Ginreport man nga ang host country ukon receiving country sang anay presidente para sa iya interim release ang nagpasugot nga magkooperar sa Korte, lakip na ang pagpatigayon sang anuman nga mga pamaagi nga kinahanglanon sang Pre-Trial Chamber.
Sa subong, wala pa sang ruling ang ICC sa interim release request kag ang kumpirmasyon sang mga panumbungon ang pending sa karon matapos nga naghingyo ang depensa nga i-adjourn indefinitely ang trial bangud ang anay presidente ang gina-alegar nga naga-antos sang cognitive impairment nga makaapekto sa iya ikasarang sa pagtindog sa iya hearing.
