Ginapamatokan sang International criminal Court (ICC) prosecutors ang luyag sang kampo ni former President Rodrigo Duterte nga i-hold anay ang kaso bangud sa ginaalegar pagkadula sang memorya sini.
Suno sa prosecutors, indi mahimo nga untaton ang trial sang anay presidente sa pihak sang rason sang legal team sini nga indi na niya masarangan nga mag-atubang pa sa kaso bangud wala na ini sang may madumdoman mangin sa pagkilala sa myembro sang iya pamilya.
Pahayag pa sang prosecutors, indi maathag kag kulang ang ginpasa nga medical reports sang abogado ni Duterte.
Posible dugang pa nila, wala nakahibalo ang mga doctor nga naghimo sang reports kun paano ang sistema sa international trials.
Sandig sa prosecution, ang ginatawag nga “fit to stand trial” ang wala naga patimaan nga kinahanglan healthy si Duterte.
Ang importante lamang nga makahangop ini sa trial, makasunod sa proceedings, maka-istorya sa iya mga abogado kag makapartisipar kun kinahanglanon.
Agud masolbar ang issue, luyag sang prosecutors nga magpatigayon sang bag-o nga medical checks ang korte pinaagi sa mga neutral experts nga may eksperyensya sa medisina kag sa international law.
Nagahingyo man ang prosecutors sa korte nga hatagan sila sang access sa medical files, test results kag iban pa nga impormasyon nga gingamit sang doctor ni Duterte sa pagsulat sang reports.
Nagapanindugan ang International Criminal Court nga indi dapat mag-untat ang trial bangud lang sa mga rason sang kampo sang former president.
Nahibaluan nga natalana kuntani sa Setyembre 23 ang hearing ni Duterte apang gin-postpone ini kag tubtob subong wala pa sang bag-o nga petsa.
