Matapos nga ipaguwa ang warrant of arrest sang korte, plano sang gobyerno nga hinyuon ang bulig sang International Police Organization (Interpol) para mapabalik sa pungsod si Atty. Harry Roque nga yara subong sa Netherlands.
Si Roque ang may mga kaso nga qualified human trafficking kaupod si Cassandra Ong kag 48 ka iban pa matapos madiskubrehan ang scam hub sa Porac, Pampanga.
Ginpahayag ni Palace Press Officer Atty. Claire Castro, nga nasambit ni Undersecretary Nicky Ty sang Department of Justice nga makig-angut sila sa Interpol agud mapabalik sa Pilipinas si Roque.
Ginpahayag ni Castro nga indi pwede nga i-insist ni Roque ang iya nga rason nga indi siya mahimo arestuhon sang Interpol bangud may ara pa ini nga pending application para sa political asylum. Ini bangud may warrant of arrest batuk kay Roque kag may kaso nga ginapangatubang diri sa Pilipinas.
Suno kay Castro nga ang kinahanglan pamatud-an ni Roque ang depensa niya nga political harassment ang ginahimo sang gobyerno sa iya bangud kun wala sang basehan ang kaso nga ginpasaka batuk sa iya wala kun tani ini naisyuhan sang warrant of arrest sang korte.
Matandaan nga si Roque kag iban pa nga kapareho nga akusado sa non-bailable case nga qualified human trafficking, ang una na nga gin-isyuhan sang Angeles City Regional Trial Court (RTC) sang warrant of -arrest.
May kahilabtanan ang kaso sa ginapahayag iligal nga aktibidad sang Lucky South 99, nga isa ka Philippine Offshore Gaming Operator (POGO) sa Porac, Pampanga nga ginpasarado sang gobyerno.
Si Roque ang nagguwa sang pungsod matapos maangut ang pangalan sini sa POGO.
Yara sa karon sa The Netherlands si Roque kag naga-request sang political asylum.
