ROXAS CITY – Nagpasiguro ang isa ka investor nga pangitaon sini ang hustisya sa wala mabalik nga investment sa Double your Money Investment scam ni Patroceño Don Chiyuto.
Sa exclusive interview sang Bombo Radyo Roxas kay alyas Rein, gin-ako sini nga nasilaw siya sa inggat sang kuwarta matapos nabaton ang payout gikan sa una nga gin-invest nga kantidad sang bulan sang Septiembre sang nagligad nga tuig
tobtob ginbubo sini ang kapital, sweldo, 13th month pay kag nagpangutang pa agud magdoble ang iya investment.
Aminado si Alyas Rein nga nagduda siya nga may indi maayo nga matabo sang nagdeklara sang holiday sang bulan sang Enero si Chiyuto bangud sa paghikot sini sang pila ka mga dokumento para sa kumpaniya.
Gintuad pa sini nga isa man sa mga rason sa pagbubo sini sang tanan nga kuwarta sa double your money ni Chiyuto agud mapreparahan ang pagbun-ag sang asawa kag bunyag sang ila anak.
Ginpahayag pa ni Alyas Rein nga wala man nagkulang sang pahanumdum ang iban nga mga abyan nga indi pag-ibubo ang tanan nga savings kag kuhaon na ang kapital.
Mabug-at man ang iya buot, apang wala na ini sang mahimo kundi liwat magdoble kayod labi na nga ginasukot na siya sang gin-utangan.
Apang ginkumpirma sini nga nagaplano siya nga magpasaka sang panumbungon agud bisan paano mahatagan sang hustisya ang nadangatan sang iya investments nga gikan sa hard earned money.
Samtang nagapati si Rein nga may ginabasa ang babaye nga naglive sa FB kagab-i gamit ang account ni Chiyuto.
Suno diri nga mas nagconcentrate siya sa pagbasa sa mga komento sang mga netizens nga lunsay naghatag sang negatibo nga feedback batuk kay Chiyuto sa baylo nga magkomento.
