Ginarespeto sang Iloilo Police Provincial Office (IPPO) ang desisyon sang amay kag lolo ni Frank Rois Barbasa nga magsulat sa National Bureau of Investigation (NBI) Region 6 agud magpatigayon sang parallel investigation angut sa kaso.
Sa interview sang Bombo Radyo kay Police Lieutenant Colonel Rolando Araño, spokesperson sang IPPO, iya ginpahayag nga ila ginarespeto ang amo nga tikang bangud ini ang kinamatarong sang pamilya kag makabulig man para sa ila nga kaathagan.
Suno kay Araño, ginpa-athag man nila nga ang iloy ni Barbasa ang kumbinsido sa resulta sang autopsy kag imbestigasyon sang Pavia Municipal Police Station, kun sa diin ang mga ebidensya kag sirkumstansiya nagatudlo nga wala sang foul play sa kamatayon sang biktima.
Nahibaluan nga ginpamatud-an sang resulta sang autopsy kag sang mga impormasyon nga nakuha sang kapulisan halin sa pamilya, ilabi na sa bahin sang iloy, nga ginhingyo nga indi na pag-ibutyag sa publiko.
Sa subong, padayon ang koordinasyon sang kapulisan sa pamilya samtang ginatamod ang ila mga kahingyuhan kag desisyon sa padayon nga imbestigasyon.
