Liwat nga ginatudlo sang Iran ang mga pungsod sa Europa bilang may salabton sa kapaslawan sang 2015 Iran nuclear deal, pila ka-adlaw antes ang natalana nga paghinun-anon sa Istanbul kaupod ang Britain, France, kag Germany.
Suno kay Esmaeil Baqaei, tigpamaba sang Iranian foreign ministry, ginabasol sang Iran ang mga partido sa Europa nga responsable sa kapabayaan sa pagpatuman sang kasugtanan nga nagatumod sa ginapahayag kakulangan sang mga European Union sa pagtuman sang tagsa nila ka mga obligasyon.
Nahibaluan nga ang kasugtanan nga ginpirmahan 2015 ang may katuyuan nga limitahan ang nuclear program sang Iran kabaylo sang pagkakas sang silot. Kalakip sa mga nagpirma ang Iran, Britain, China, France, Russia, United States, kag Germany.
Apang, hinali ini nga nadula sang 2018 matapos nga nag-atras ang Estados Unidos sa idalom ni U.S. President Donald Trump, kag liwat nga nagpatuman sang lapnagon nga silot sa Iran.
Apisar nagpahayag sang suporta ang European Union, wala gid nangin epektibo ang mekanismo pang-ekonomiya nga kuntani amo ang masawo sa epekto sang U.S. sanctions.
Bangud sini, madamo sang kompanya sa west ang nag-atras sa Iran, nga labi pa nga nagpalala sa krisis sang ekonomiya sang pungsod.
Samtang, ang pagsinapol sa Biyernes, Hulyo 25, sa Istanbul ginalauman nga magatalakay sa posibilidad sang pagtukod liwat sa kasugtanan.
