Magapatigayon sang state funeral ang gobyerno sang Iran para sa mga military commander sini, kalakip ang mga top scientists nga napatay sa ginhingadlan nga 12-day war.
Natalana ini sa adlaw sang Sabado, Hunyo 28, 2025.
Madumduman nga nag-umpisa ang airstrike sa tunga sang Israel kag Iran sang Hunyo 13 kun sa diin sa una nga adlaw sang giyera hinali nga napatay ang pinuno sang Revolutionary Guards nga si Hossein Salami.
Ginsundan pa ini sang mga serye sang pagbayluhanay sang missile nga nagresulta sa pagkapatay sang pila pa ka mga military commanders sang Iran, kalakip ang wala na gintumod nga numero sang mga scientists – pila sa mga ini nagatrabaho sa mga nuclear site, uranium enrichment site, kag ballistic missile program sang nasambit nga pungsod.
Base sa updated report nga ginpaguha sang Health Ministry sang Iran, naglab-ot sa 610 nga mga sibilyan ang napatay sa 12-day war samtang masobra 4,700 ka tawo man ang napilasan kag padayon nga ginabulong sa mga bululngan. Samtang, sa official man nga report sang Israel, naglab-ot sa 28 ka tawo ang napatay sa retaliatory attack sang Iran.
