Naglunsyar sang joint operation ang navy kag aerospace forces sang Islamic Revolutionary Guard Corps (IRGC) gamit ang mga missiles kag kamikaze drones batuk sa strategic United States military base sang Kuwait kag Bahrain.
Suno sa opisyal nga pahayag sang IRGC nga ginpaguwa sang state-run media outlet nga Press TV, ang malapnagon nga pag-atake ang direkta nga sabat sang Iran sa mga nauna nga opensiba kag pag-atake sang US military batok sa mga pasilidad kag pwersa sini.
Target sang mga drone kag missile ang mga installations kun sa diin nahamtang ang mga suldado sang Amerika sa nasambit nga mga pungsod sa Middle East.
Nagpaandam man ang pamunuan sang Revolutionary Guards nga ang paglapas sang US sa nagaluntad nga ceasefire maathag nga paglapas sa Clause 1 sang Islamabad Memorandum of Understanding.
Sa sini nga rason, ginpaandaman sang Iran ang nasambit nga mga pungsod nga ang bayolente nga mga tikang magatuga sang bug-os nga atraso kag pagkapukan sang tanan nga mga proseso kag negosasyon sa diplomasya sa pagpanumbalik sang kalinong sa rehiyon.
