Nagpaandam ang Iran nga ang mga base, pasilidad kag assets sa Estados Unidos sang America ang mangin “lehitimo nga target” sini kun mag-atake ang US.
Kasunod ini sang 10 tubtub 15 ka adlaw nga extension nga ginhatag ni US President Donald Trump sa Iran agud mag-negosyar sang nuclear deal.
Suno kay Amir Saeid, Ambassador sang Iran sa United Nations, ginhimo niya ang pahayag sa isa ka sulat nga ginpadala kay Antonio Guterres kag sa presidente sang Security Council.
Nabutang sa amo nga sulat ang post ni Trump sa social media sang Miyerkules, nga nagasiling nga mahimo kinahanglan sang US ang mga base militar sang UK, lakip ang isa sa Indian Ocean, kon indi maghimo sang kasugtanan ang Iran.
Dugang pa sang ambassador sang Iran, ang pahayag sang Presidente sang Estados Unidos nagapakita sang matuod nga katalagman sang military aggression, nga ang resulta sini makahalit sa rehiyon kag mahimo nga mangin seryoso nga pamahog sa seguridad.
Nahibaluan, una na nga ginreport nga ang Amerika nagahanda sa paglunsyar sang isa ka pag-atake sa Iran sa tunga sang pagpadala ni Trump sang mga warship, fighter jet kag iban pa nga pwersa militar sa Middle East agud punggan ang Iran sa paghimo sang nuclear bomb, bagay nga ginapanginwala sang Tehran.
