Nagpaandam ang Iran nga magalunsyar ini sang mas mabaskog kag mas madasig nga pagtimalos sa tion nga liwat nga mag-atake ang Estados Unidos sang Amerka, matapos ang panibag-o nga away sang duha ka pungsod.
Suno kay Iranian parliament speaker kag chief negotiator Mohammad Bagher Ghalibaf, tapos na ang tyempo sang “proportionate responses.”
“Any aggression against Iran’s interests and security will receive a faster, more intense and more painful response,” pahayag ni Ghalibaf.
Nagpaandam man ang Iran nga magatukod ini sang “prohibited zone” malapit sa Strait of Hormuz kag magadagdag sang sanctions sa mga barko nga magasulod diri nga wala sang pahanugot halin sa Tehran.
Samtang, ginpahayag sang US Central Command (CENTCOM) nga wala nangin madinalag-on ang pag-atake sang Iran batuk sa duha ka mga barko sang Amerika.
Bilang sabat, gin-atake sang US ang tatlo ka mga oil tanker nga ginaalegar konektado sa Iran’s Revolutionary Guards.
Nagbalos man ang Iran kag nag-report sang mga pag-atake batuk sa pila ka mga oil tanker kag isa ka US naval drone, apang ginpanginawala ini sang CENTCOM.
